এটা গীতৰ সফলতা/ বিফলতা বুলিলে কি বুজে বুলি প্ৰশ্ন কৰাত তেওঁ কয় যে, “সাধাৰণতে, গীত এটিৰ সফলতা/বিফলতা বুলি ক’বলৈ গ’লে গীতটিৰ বাণিজ্যিক সফলতা বা বিফলতাকে বুজা যায় বা বৰ্তমান সময়ত গীতটিৰ ইউটিউব বা স্পটিফাইত দৰ্শক কিমান তাকে বুজা যায়; কিন্তু মই ভাবো যে, গীত এটিৰ সফলতা নিৰ্ভৰ কৰিব গীতটিৰ শ্ৰোতা-দৰ্শকৰ ওপৰত ইয়াৰ প্ৰভাৱ কেনেকুৱা! যদি গীত এটিয়ে কোনো এজন মানুহক জীৱনৰ যিকোনো কঠিন মূহুৰ্ততে প্ৰেৰণা দিছে বা তেওঁৰ মনত নতুন চিন্তাৰ উন্মেষ ঘটাব পাৰিছে তেনেহ’লে তাতে গীতটিৰ সফলতা নিহিত হৈ আছে। তেনেকুৱা বহুতো সুন্দৰ সুন্দৰ অসমীয়া গীত আছে যিয়ে আমাকো বিভিন্ন সময়ত প্ৰেৰণা দিছে কিন্তু সেইসমূহ গীতক যদি আমি ভিউচৰ ফালৰ পৰা চাব যাওঁ অসফল যেন লাগিব কিন্তু যিকোনো সচেতন কলা সাহিত্যনুৰাগী মানুহক যদি শুনোৱা যায় তেওঁলোকে কিন্তু নিসন্দেহে ভাল বুলিয়ে ক’ব।” পিছলৈ, আকাশদ্বীপক “শিল্পী” ৰ সংজ্ঞা জানিবলৈ বিচৰাত তেওঁ কয় যে, “যিসকল কলা সংস্কৃতিৰ লগত জড়িত লোকে প্ৰকৃতাৰ্থত সমাজৰ উন্নতিৰ বাবে কাম কৰি আছে তেওঁলোককে মই “শিল্পী” বুলি ক’ম। মই ভাবো যে, সামাজিক সচেতনতাই এজন সংগীতজ্ঞ, অভিনেতা, গীতিকাৰ আদি সকলোকে শিল্পীলৈ পৰিবৰ্তিত কৰে।”

আকাশদ্বীপ বাৰুতীৰ আগন্তুক পৰিকল্পনাৰ বিষয়ে জানিবলৈ বিচৰাত তেওঁ কয় যে, “আমাৰ Jamming Buddies ৰ আহিবলগীয়া বহুতো প্ৰকল্প আছে। অলপতে, আমি “দাইটি” গীতটি মুকলি কৰিছিলো। নতুনকৈ আমি পপ আৰু নিঅ’ ছ’ল( Neo soul) শৈলীৰ এটি গীতৰ কাম আৰম্ভ কৰি আছোঁ। অতিশীঘ্ৰে নতুন গীতটি শুনিবলৈ পাব।”