সংগীত জগতখনত এখোজ দুখোজকৈ আগবাঢ়ি অনুৰাগীৰ শাৰীৰ দীঘলীয়া কৰা অঞ্জু পাঞ্চিৰ কণ্ঠৰে মুক্তি লাভ কৰিবলৈ সাজু হৈছে এটি নতুন গীত “মৰমৰ দাপোণত”। অহা ১৫ আগষ্ট তাৰিখলৈ গীতটিয়ে লাভ কৰিব মুক্তি। গীতটি এইবাবেই ব্যতিক্ৰম কিয়নো ইয়াত সংযোজন হৈছে মণিপুৰী কথাও। শিলচৰৰ এগৰাকী নৱপ্ৰজন্মৰ ৰেপাৰ অভিষেক টংগব্ৰাম অঞ্জু পাঞ্চিৰ সৈতে যুটীয়া ভাৱে গীতটিত জড়িত হৈ আছে। গীতটি অসমীয়া মণিপুৰী কথাৰে নিৰ্মিত এটি প্ৰেমৰ গীত, ইয়াত সংগীত কৰিছে কালেইঘটে। আমি অধিক কথা কোৱা লোকসকলক বাৰু “কথা চহকী” অথবা “কথাৰে ধনী” বুলি আখ্যা নিদিওঁ নে? সেই একেখিনি কথাকেই আমি প্ৰয়োগ কৰিব পাৰোঁ আমাৰ সংগীত ক্ষেত্ৰখনক লৈও; শেহতীয়াকৈ এই ক্ষেত্ৰখনত আমি এনে একাংশ গীত শুনিছো যি সমূহৰ কথা ইমানেই অধিক গ্ৰহণযোগ্য যে সেইসমূহ বাৰম্বাৰ শুনিবলৈ আমি প্ৰয়াস কৰোঁ। মনোৰঞ্জন এক অবিৰত প্ৰক্ৰিয়া; যেতিয়া কোনো এজন নৱপ্ৰজন্মৰ প্ৰতিভাই স্তব্ধতাক আওঁকান কৰি মনোৰঞ্জন প্ৰদানৰ অৰ্থে তেওঁলোকৰ সৃষ্টি সমূহ শ্ৰোতা-দৰ্শকৰ মাজলৈ উলিয়াই দিয়ে তেতিয়া তেওঁলোকৰ প্ৰতি জনসাধাৰণ আৰু অধিক আকৰ্ষিত হৈ পৰে। সম্প্ৰতি সময়ছোৱাত একোগৰাকী নৱপ্ৰজন্মই সাংস্কৃতিক দিশটোৰ প্ৰতি দেখুওৱা আগ্ৰহ সঁচাকৈ উল্লেখনীয়। এগৰাকী গীতিকাৰ, সুৰকাৰ অথবা এজন কন্ঠশিল্পী ৰূপে নিজক প্ৰতিষ্ঠা কৰিবলৈ তেওঁলোকে কৰা প্ৰচেষ্টা সমূহ ইমানেই অধিক গ্ৰহণযোগ্য যে তেওঁলোকৰ সৃষ্টিয়েই ক্ষন্তেকতে জনপ্ৰিয়তা লাভ কৰাৰ উপৰিও ভাইৰেল হৈ পৰে চচিয়েল মিডিয়াত। পাৰ্থিৱ সুখক কিছু সময়ৰ বাবে উফৰাই দৰ্শক-শ্ৰোতাক প্ৰদান কৰা আমোদনেৰে আত্মসন্তোষ্টি লাভ কৰা নৱপ্ৰজন্মৰ বৃহৎ সংখ্যাই সাংস্কৃতিক ক্ষেত্ৰখনত আহিবলগীয়া সময়ত নতুনৰ যোগানৰ ধৰিব।অসমৰ সাংস্কৃতিক জগতখন পৃথিৱীৰ ভিতৰতেই চহকী। এই ক্ষেত্ৰখনৰ বিভিন্ন শিতানত অন্তৰ্ভূক্ত শিল্পী সমূহৰ তেওঁলোকৰ কলাটোক লৈ থকা শ্ৰদ্ধা তথা ভক্তিয়েই ইয়াক বিভিন্ন ক্ষেত্ৰত আগুৱাই লৈ যাবলৈ সক্ষম হয়।

আগন্তুক মুক্তিপাবলগীয়া এই গীতটিক লৈ অঞ্জু পাঞ্চিৰ লগতে ৰেপাৰ অভিষেকলৈ ৰূপালীপৰ্দাৰ তৰফৰ পৰা জনাইছো অলেখ অযুত শুভকামনা। তেওঁলোকৰ এই যুটিটোক জনসাধাৰণে যাতে সঁহাৰি জনায়।

এটা গীতৰ সফলতা/বিফলতাৰ লগতে গীত এটিৰ কোনটো উপাদানত অঞ্জু পাঞ্চিয়ে অধিক গুৰুত্ব দিয়ে বুলি কৰা প্ৰশ্নৰ উত্তৰত তেওঁ কয় যে, “এটা গীতৰ সফলতা বুলি কলে শ্ৰোতা দৰ্শকৰ আগ্ৰহ আৰু গীতটিৰ জনপ্ৰিয়তাৰ ওপৰত নিৰ্ভৰ কৰে। এটা গীতক সফলতাৰ শিখৰত তুলি নিবলৈ গীতটিৰ সৈতে জড়িত প্ৰতিজন শিল্পী, কলা-কুশলীয়ে কষ্ট, ধৈৰ্য্য আৰু ত্যাগ স্বীকাৰ কৰিবলগীয়া হয়। মই ভাবো, সফলতাৰ কোনো সংজ্ঞা নাথাকে, এয়া এক উপলব্ধি এক আত্মতৃপ্তি। জীৱনত বিফলতাতকৈ ডাঙৰ শিক্ষা একোৱেই হ’ব নোৱাৰে ; বিফলতাই সফলতাৰ মূলমন্ত্ৰ। বিফলতা নেওঁচি সফলতা পোৱাটোহে প্রকৃত সোৱাদ; মোৰ দৃষ্টিত সংগীতৰ কোনো বিফলতা নাথাকে কাৰণ সংগীত এক সাধনা। কথা,সুৰ, সংগীত আৰু গায়কী এই গোটেই খিনিৰ সংমিশ্ৰণত গীত এটিয়ে প্ৰাণ পাই উঠে; গীত এটি এটা উপাদানৰ ওপৰত নিৰ্ভৰ নকৰে যদিও কথা আৰু সুৰৰ গুৰুত্বপূৰ্ণ ভূমিকা আছে।” কন্ঠশিল্পী গৰাকীৰ আগন্তুক প্ৰকল্পৰ বিষয়ে জানিবলৈ বিচৰাত তেওঁ কয় যে, “মোৰ আগন্তুক বহুত পৰিকল্পনা আছে, মই অসমীয়া সংগীত জগত খনৰ বাবে ৰাইজৰ বাবে গীত গাই যাব বিচাৰিম। যিখিনি আমাৰ থলুৱা গীত আছে সেইবোৰক লৈ নতুন কিবা সৃষ্টি কৰিবলৈ প্ৰচেষ্টা কৰিম; বিহু গীত বা বিহু সুৰীয়া গীতৰ মাজতেই আবদ্ধ হৈ থাকিব মই বিচৰা নাই । অসমীয়া থলুৱা সংগীত যেনে ধৰক বৰগীত , ঝুমুৰ,লোক সংগীত , চিয়াগীত আদিৰ ওপৰতো কাম কৰিবলৈ হেঁপাহ আছে আৰু ইয়াৰ লগতে পশ্চিমীয়া সংগীতৰ ওপৰতো কাম কৰিবলৈ আগ্ৰহ আছে। ইয়াৰ উপৰিও, বলীউড ষ্টাইল, ফক মিউজিক edm আৰু ৱেষ্টাৰ্ণ গীতৰ ওপৰতো মই মনোনিৱেশ কৰিছো। ইতিমধ্যে তিনিতা গীত ৰাইজৰ মাজলৈ আগবঢ়াই দিছোঁ। আৰু, আহিবলগীয়া সময়ত মুক্তি পাবলগীয়া গীত সমূহ ৰাইজে আঁকোৱালি ল’ব বুলি আশা কৰিছো। নতুন নতুন পৰিকল্পনাৰ মাজেৰে গীত সমূহ আগবঢ়াবলৈ চেষ্টা কৰিছো।”

তেওঁ আগলৈ কয় যে, “প্ৰত্যেকটো গীতত নতুনত্ব দিবলৈ প্ৰচেষ্টা কৰিছো সকলোৱে মৰম দিব আশীৰ্বাদ কৰিব আৰু ৰূপালীপর্দাৰ সমূহ কৰ্মকৰ্তা লৈ মোৰ ফালৰ পৰা আন্তৰিক কৃতজ্ঞতা জ্ঞাপন কৰিছো।” এইখিনিতে, এইগৰাকী নৱপ্ৰজন্মৰ প্ৰতিভাক ৰূপালীপৰ্দা পেজটোৰ তৰফৰ পৰা তেওঁৰ আহিবলগীয়া প্ৰকল্পসমূহক লৈ জনাইছো শুভকামনা।