অসম নাট্য সন্মিলন যোৰহাট শাখাৰ তাপস তৰুণ শইকীয়াৰ তত্বাৱধানত অসমৰ ভিন্ন প্ৰান্তত “বিবাহ : এটি বাঁহীৰ সুৰ ” নাটকত বলিষ্ঠ অভিনয়ৰে দৰ্শকৰ মাজত জনপ্ৰিয় হৈ পৰা শুভাশীষ ৰিয়ান কাশ্যপে বহু প্ৰতিযোগিতাত লাভ কৰিছিল শ্ৰেষ্ঠ অভিনেতাৰ সন্মান ৷

যোৰহাটৰ সন্তান শুভাশীষ বৰ্তমান টেলিভিছন জগতৰ এখন চিনাকী মুখ। ৰং চেনেলৰ জনপ্ৰিয় ধাৰাবাহিক “ভাৰাঘৰ” ৰ তৃতীয় সংস্কৰণৰ বহু কেইটা খণ্ডত বলিষ্ঠ অভিনয় প্ৰতিভাৰে দৰ্শকৰ মন জয় কৰিবলৈ সক্ষম হয় অভিনেতা গৰাকীয়ে ৷ পিছলৈ ৰেঙনি চেনেলত প্ৰচাৰিত ধাৰাবাহিক ‘ অালপনা’ ত কৰা অভিনয়ৰ যোগেৰে ৰাইজৰ মাজত চৰ্চিত হৈ পৰে শুভাশীষ ৷

শুভাশীষৰ প্ৰতিভা শেহতীয়াকৈ অধিক জনপ্ৰিয় হৈ পৰিছে ৰং চেনেলত প্ৰচাৰিত “তোমাৰ মৰমে মোক” ধাৰাবাহিক খনৰ “ৰাঘৱ” চৰিত্ৰটোৰ জৰিয়তে ৷ ৰং চেনেলৰ এখন জনপ্ৰিয় ধাৰাবাহিকৰ অন্যতম মুখ্য চৰিত্ৰত অভিনয় কৰা শুভাশীষ ৰিয়ানে ইয়াৰ উপৰিও বহুকেইটা ভিডিঅ’ গীতটো অভিনয় কৰিছে৷

অভিনয়ৰ প্ৰতি থকা নিষ্ঠাই তেওঁক এনেদৰেই সুন্দৰৰ পথেৰে আগুৱাই যোৱাৰ অবিৰত ইন্ধন যোগাই যাওঁক। অসমবাসীয়ে এজন নিপুণ অভিনয় শিল্পী লাভ কৰক। অভিনয়ৰ নতুন দিগন্ত উন্মোচন কৰাত তেওঁ সফল হোৱাৰ কামনাৰে ৰূপালী পৰ্দাৰ ফালৰ পৰা শুভাশীষ ৰিয়ানক জনাইছো তেওঁৰ আগন্তুক জীৱনৰ অশেষ শুভকামনা।