গীতটিত কথা দিয়াৰ লগতে ইয়াত সুৰ-সংগীতৰ দায়িত্বতো আছে মিনিমি নিজেই। সংগীত প্ৰযোজনা ৰফলালাৰ; গীতটিত শব্দ সংমিশ্ৰণ আৰু বাণীবদ্ধ কৰিছে দীপক দাসে। “ৰেপকেপ” ৰ দ্বাৰা সংগীত ক্ষেত্ৰখনত খোজ পেলোৱা মিনিমিৰ “অপ্ৰতিৰোধ্য” এলবামটিত অন্তৰ্ভূক্ত গীতকেইটিয়ে ইয়াৰ পূৰ্বেই জনপ্ৰিয়তা লাভ কৰাত সক্ষম হৈছিল আৰু উক্ত এলবামটোৰেই আন এটি গীত হৈছে সদ্যমুক্তিপ্ৰাপ্ত “ইতিহাস”। ইয়াৰ পূৰ্বেও, আবাহন, গম পাবি ৰহ, “মই খেতিয়ক”, “মোৰ দেশ”ৰ লগতে কিছুদিন পূৰ্বে শ্ৰোতা-দৰ্শকৰ কাষ চপা তেওঁৰ অন্যতম ৰেপ সন্নিৱিষ্ট গীত “বহুত ওপৰৰ মাল” য়ে জনসমাজত বহুল প্ৰভাৱ পেলাবলৈ সক্ষম হৈছে। এক কথাত ক’বলৈ গ’লে, মিনিমিৰ গীত সমূহে জনসাধাৰণক এক নিৰ্দ্দিষ্ট বিষয়ৰ ওপৰত চিন্তাৰ অৱকাশ দিছে। মিনিমিৰ গীত সমূহত থকা নতুনত্বই তেওঁক শ্ৰোতাৰ কাষলৈ টানি আনিছে। শেহতীয়াকৈ সংগীত ক্ষেত্ৰখনত নৱপ্ৰজন্মৰ প্ৰচেষ্টাৰে এনে একাংশ গীতে মুক্তি লাভ কৰিছে যিয়ে সংগীত প্ৰেমী শ্ৰোতাক আমোদ প্ৰদানৰ সমান্তৰালকৈ দিছে প্ৰশান্তি; নৱপ্ৰজন্মৰ প্ৰচেষ্টাত নিৰ্মিত প্ৰায় সমূহ গীতেই যেন বৰ্তমান স্পৰ্শ কৰি গৈছে সকলোকে। আমি নজনাকৈয়ে একোটা সুন্দৰ গীতক লৈ নিজাকৈ আকৃষ্ট হওঁ, সেই গীতটি প্লে-লিষ্টত “ৰিপিট” ম’ডত বাৰ বাৰ চলিলেও আমাৰ আমনি নলগাৰ সমান্তৰালকৈ সেই গীতটিৰ প্ৰতি আৰু দুগুণ উৎসাহ আমাৰ বাঢ়ে। এনে উৎসাহবোৰ বৃদ্ধিৰ ক্ষেত্ৰত সম্প্ৰতি সময়ছোৱাত আগ-ভাগ লৈছে নৱপ্ৰজন্মই; বিভিন্ন প্ৰশান্তিমূলক তথা আমোদদায়ক গীত সমূহৰ লগতে ৰেপ ক্ষেত্ৰখনতো নৱপ্ৰজন্মৰ সক্ৰিয়তা পৰিলক্ষিত হৈছে।

মিনিমিৰ আগন্তুক পৰিকল্পনা আৰু প্ৰচেষ্টা সমূহক লৈ তেওঁক ৰূপালীপৰ্দাৰ তৰফৰ পৰা জনাইছো শুভকামনা। মিনিমি উঠি অহা প্ৰজন্মটোৰ বাবেও যেন হৈ ৰয় এক উৎসাহৰ কাৰণ।