“নদীৰ কুল নাই” শীৰ্ষক তথ্যচিত্ৰখনত দেখুওৱা হৈছে নৈখনৰ সৈতে জড়িত কিছু লোকৰ নিজ আৱেগ প্ৰকাশৰ মাধ্যম ৰূপে ব্যৱহৃত “সংগীত” ক; যি “সংগীত” তাত বাস কৰা তেওঁলোকৰ পূৰ্বপুৰুষৰ পৰাই চলি আহিছে। ইয়াৰ সৃষ্টি ক’ত, কেতিয়া আৰু কেনেদৰে সেই কথাৰ সৈতে অৱগত নহয় তেওঁলোকো; কিন্তু নদীৰ বৈশিষ্ট্য বিৱৰণ অথবা নৈখনক “পাগলা” আখ্যা দি তাৰ পুংখানুপুংখ বাখ্যা দাঙি ধৰে সংগীতৰ মাজেৰেই এওঁলোকে। বাৰিষাৰ কালত নৈখন এখন সাগৰলৈ পৰিণত হয়; যাৰ আদি-অন্তৰ পৰিসীমা চাব পৰা নাযায়। নৈখনে সেইটো সময়ত আপোন-পৰ নামানি উটুৱাই লৈ যায় সকলোকে। সেইখিনি সময়ত তাত ৰৈ যোৱা একাংশৰ বাবে আশ্বাস হৈ পৰে নেদেখা জন; ফলত তেওঁলোকে এনে গীত বোৰৰ জৰিয়তে আৰাধনা কৰে নেদেখা জনক।

গীত সমূহ পৰিৱেশনৰ বাবে কোনো নিৰ্দ্দিষ্ট উৎসৱ অথবা মঞ্চৰ এওঁলোকক প্ৰয়োজন নহয়। তথ্যচিত্ৰ খনত ব্যৱহৃত বিষয়বস্তু অথবা ইয়াৰ দৃশ্যাংশবোৰে অধিক জনসাধাৰণক আকৰ্ষিত কৰিবলৈ সক্ষম হৈছে। তথ্যচিত্ৰখনৰ প্ৰযোজনা কৰিছে কিশলয় ভট্টাচাৰ্য্য, নেশ্বনেল ফাউণ্ডেচন অৱ ইণ্ডিয়া আৰু আভা ফিল্মচে। আনহাতে, সহঃপ্ৰযোজনা কৰিছে ময়ূৰী ৰাজকোঁৱৰে।

“নদীৰ কুল নাই” য়ে ইতিমধ্যে 12th International Documentary & Short Film Festival of Kerala,2019 ত চুটি ছবি প্ৰতিযোগিতাৰ শিতানত মনোনয়ন লাভ কৰিবলৈ সক্ষম হোৱাৰ উপৰিও ArtEast Art Festival India International Centre ত পোনপ্ৰথবাৰৰ প্ৰদৰ্শিত কৰা হৈছিল এই চুটি ছবিখন। লগতে, আন আন ৰাষ্ট্ৰীয়-আন্তঃৰাষ্ট্ৰীয় ক্ষেত্ৰৰ ছবি সমাৰহতো “নদীৰ কুল নাই” য়ে লাভ কৰিছিল সমাদৰ। অসমৰ সোণতলি গাওঁৰ আৰিকাটি, কাছাৰিপাম আৰু পূৰণ গাওঁ নামে ঠাইত বসবাস কৰা কেইবাগৰাকীও লোকৰ সহায়ৰ দ্বাৰা ছবিখনৰ দৃশ্যগ্ৰহণ কৰা হৈছিল। দৃশ্যগ্ৰহণত জড়িত আছিল চন্দ্ৰ কুমাৰ লগতে উক্ত চুটি ছবিখনৰ শব্দ বিভাগত আছিল ক্ৰমে ৰুক্মজিৎ বৰুৱা আৰু নয়ন ভূঞা। সম্পাদনা কৰিছিল জেদৰিন ফুকনে।

“আখুনী” ৰ জনপ্ৰিয়তাক কেন্দ্ৰ কৰি ৰূপালীপৰ্দাৰ সৈতে পৰাশৰ বৰুৱাৰ হোৱা এক্সক্লুচিভ কথা-বতৰাত তেওঁক যেতিয়া ছবিখনক লৈ হোৱা অভিজ্ঞতাৰ বিষয়ে সোধা হৈছিল তেতিয়া কয় যে, “২০১৭ চনৰ শেষৰ ফালে যেতিয়া ছবিখনৰ চিত্ৰনাট্য খিনি পঢ়িবলৈ পাইছিলো তেতিয়া মই প্ৰথম প্ৰতিক্ৰিয়াতে এই ছবিখন গ্ৰহণ কৰি লৈছিলো কাৰণ ইয়াৰ আগত মই কোনো ছবিৰ এনে “ট্ৰীটমেন্ট” দেখিবলৈ পোৱা নাছিলো। উৎসাহ আৰু উৎকন্ঠাৰ সৈতে ছবিখনক লৈ বিভিন্ন প্ৰশ্নও মোৰ মনত সৃষ্টি হৈছিল। যদিও এই ছবিখন বন্ধুত্ব নাইবা নিত্য নৈমিত্তিক ঘটা কাহিনীৰ ওপৰত নিৰ্মিত তথাপিও ছবিখন আমাৰ উত্তৰ-পূৰ্বাঞ্চলৰ ওপৰত আধাৰ কৰা হৈছিল। ইয়াত কেৱল “আখুনী” ৰে বনোৱা খাদ্যটোৱেই সন্নিৱিষ্ট নাছিল; ইয়াত আছিল উত্তৰ-পূৰ্বাঞ্চলৰ লোক সকল দিল্লীলৈ নাইবা আন ঠাইলৈ গৈ তেওঁলোকৰ তাত হোৱা অভিজ্ঞতা; সৰু-বৰ সমস্যা লগতে সামাজিক ও সাংস্কৃতিক ক্ষেত্ৰত হোৱা ভিন্ন মতভেদক লৈ “আখুনী” ৰ কাহিনীভাগ আচলতে আগবাঢ়িছে।”

ইয়াৰ উপৰিও, ছবিখনক লৈ পৰাশৰে কয় যে, “এতিয়ালৈ এই ছবিখনক লৈ আমাৰ পৰিচালক Nicolas Kharkongor ৰ সৈতে মোৰ বহু বাৰ কথা হৈছে যে আমি এনে এটা গম্ভীৰ বিষয়বস্তুক কেনে ধৰণে সহজ- সৰল ও লঘু হাস্যৰসাত্মক ভাৱত দৰ্শকৰ আগত উপস্থাপন কৰিম আৰু কিয়? আমি দুয়ো গৰাকী উত্তৰ-পূৰ্বাঞ্চলৰ আৰু দুয়োৰে একে ধৰণৰ অভিজ্ঞতাই হৈছিল বাহিৰলৈ যাওঁতে। গতিকে ছবিখনৰ কেৱল মাত্ৰ এগৰাকী চিনেমেটো’গ্ৰাফাৰ হোৱাৰ উপৰিও মোৰ দায়িত্ব আছিল যে উত্তৰ-পূৰ্বাঞ্চলৰ নিবাসী হিচাপে মোৰ কেমেৰা আৰু মোৰ দৃষ্টিভংগীৰে অথবা মোৰ বন্ধুসদৃশ লেনচৰ মাজেৰে ছবিখনৰ কাহিনীভাগ পুংখানুপুংখ ভাৱে উপস্থাপন কৰিব পাৰো। মোৰ লেনচৰ ক্ষেত্ৰত থকা পৰিপক্কতা লগতে লাইটিং ও লোকেশ্বন আদিৰ ক্ষেত্ৰত থকা সমগ্ৰ বোধগম্যতাক ব্যৱহাৰ কৰি মই ছবিখনৰ যোগেৰে নতুনত্ব আনিবলৈ চেষ্টা কৰিছো। আচলতে, এইক্ষেত্ৰত মোক সহায় কৰিছিল মোৰ সহঃ চিনেমেটো’গ্ৰাফাৰ ধীৰাজ চেতিয়াই। আমি কেতিয়াও ভবা নাছিলো যে ছবিখন ইয়াৰ মানুহখিনিৰ আৱেগৰ সৈতে জড়িত হৈ পৰিব।

ইতিমধ্যে ভিন্ন খন ছবি সমাৰোহত ছবিখনে মনোনয়ন লাভ কৰাত আমি উৎফুল্লিত হৈ পৰিছিলো। ছবিখন চাবলৈ যেতিয়া দৰ্শকৰ দীঘলীয়া শাৰী আমি দেখিছিলো তেতিয়া আমাৰ দিল্লীত সেই প্ৰচণ্ড ৰ’দত কৰা শ্বুটিং সমূহ সাৰ্থক হৈ পৰিছিল। দিল্লীত হুমায়ূনপুৰ নামে এখন ঠাই আছে; য’ত উত্তৰ-পূৰ্বাঞ্চলৰ প্ৰায় লোকে বাস কৰে। এটা সময়ত এই ছবিখনৰ পৰিচালক নিকো তাতেই আছিল গতিকে তেওঁ যেতিয়া ছবিখন লিখিছিল তেতিয়া তেওঁৰ অভিজ্ঞতাবোৰো ইয়াত লিখিছিল। গতিকে, মই দৃশ্যগ্ৰহণ কাৰী ৰূপে মোৰ আগত এক প্ৰত্যাহ্বান আছিল যে কাহিনীটোৰ সত্যতা প্ৰদৰ্শনত যাতে মোৰ ভুল নহয়। প্ৰত্যেক দিনাই চেষ্টা কৰিছিলো যাতে মই ছবিখনক দৰ্শকৰ মাজলৈ ধুনীয়াকৈ লৈ আনিব পাৰো; এজন চিনেমেটোগ্ৰাফাৰ হিচাপে মই কেৱল ধুনীয়া শ্ব’ট লৈ দৰ্শকক কাহিনী বুজাব বিচৰা নাছিলো, মই বিচাৰিছিলো যাতে মোৰ ভিডিঅ’ ট্ৰীটমেন্টে তেওঁলোকৰ সমুখত কাহিনী প্ৰস্তুত কৰে। আৰু ,এতিয়া যিহেটো এইখন নেটফ্লিস্কত মুক্তি পাবলৈ গৈ আছে মই ইয়াত উৎসাহিত হোৱাৰ লগতে অকণমান ভয়ো খাইছো। কাৰণ মোৰ ঘৰখনৰ লগতে যদি আমাৰ মানুহখিনিয়ে এই ছবিখন আদৰি লয় মই আটাইতকৈ সুখী হ’ম।

শেষতে পৰাশৰ বৰুৱাই ছবিখনৰ প্ৰযোজনাৰ দায়িত্বত থকা Yoodlee Films কো ধন্যবাদ জ্ঞাপন কৰে। “আখুনী” ছবিখন তেওঁলোক প্ৰত্যেকজন সদস্যৰ বাবেই যে মহত্বপূৰ্ণ আৰু ছবিখনত এটা গুৰুত্বপূৰ্ণ অংশীদাৰ হ’বলৈ পাই পৰাশৰ বৰুৱা সুখী হৈ পৰিছে বুলি ব্যক্ত কৰে তেওঁ।