বীৰাংগনা সাধনী : ২৫ জুলাইৰ পৰা চিত্ৰগৃহত–উৎপল মেনা

পৰিচালক, চিনেমা খনৰ লেখক বিশ্বজিৎ বৰা ব্যস্ত “বীৰাংগনা সাধনী”ৰ শেষ পৰ্যায়ৰ কামত। কাৰণ হাতত আৰু ছয়টা মাহহে। চিত্ৰগৃহলৈ অহাৰ তাৰিখ ঠিক হৈছে। ২৫ জুলাই ২০২৫ -ত চিত্ৰগৃহলৈ আহিব বুলি ইতিমধ্যে ঘোষণা কৰিছে। চিনেমা খনৰ এগৰাকী অভিনেতা প্ৰাঞ্জল শইকীয়াই “তাৰিখ ঘোষণা” অনুষ্ঠানত কোৱা মতে, বিষয় বস্তু অনুপাতে কম বাজেটত নিৰ্মাণ কৰিছে চিনেমা খন। আমি ইমানে বুজিছোঁ– “বাজেট সমস্যা”ৰ মাজত কাম কৰিছে পৰিচালকে। অৱশ্যে পৰিচালকে কৈছে– দৰ্শকক হতাশ হোৱাৰ সুযোগ নিদিয়ে!
–চুতীয়া উন্নয়ন পৰিষদৰ প্ৰযোজনাত তথা অসম চৰকাৰৰ সহযোগিতাত নিৰ্মাণ কৰা এই অসমীয়া চিনেমা খনৰ “কিছু কাম” আমি অনুভৱৰ সুযোগ পাইছোঁ। পৰিচালকে যিমান সম্ভৱ উন্নত কাৰিকৰী কৌশল প্ৰয়োগত মন দিছে। “colorful” ৰূপালী গল্প নিৰ্মাণত মন দিছে। পৰিচালকৰ মন (মনৰ লগতে ধনৰ কথা নিশয় আহিব)– দৰ্শকক “বাহুবলী”ৰ দৰে ৰূপালী গল্প দিয়াৰ। “চৰকাৰী চিনেমা” “চৰকাৰী কাম” বুলিয়ে শেষ কৰিব বিছাৰে বা শেষ কৰ– বহুতে! উদাহৰণ নথকা নহয়। এই প্ৰসংগ চৰ্চাৰ সময়ত পৰিচালক গৰাকীয়ে আমাক কৈছিল– “মই তেনে নকৰো! বিশ্বাস কৰিব পাৰে, এখন ভাল চিনেমা দিবলৈ চেষ্টা কৰিম। দৰ্শকে এখন ভাল চিনেমা পাব। মোৰ আৰু বহুত পৰিকল্পনা আছিল! বাজেটৰ বাবে কৰিব নোৱাৰিম!”
–সতী সাধনী বা সাধনী নাৰায়ণ চুতীয়া ৰাজ্যৰ শেষ গৰাকী ৰাণী আছিল। জন্ম ১৫ শতিকাৰ শেষ ভাগত হৈছিল বুলি অনুমান কৰা হয়। এই “চৰিত্ৰ”টোৱে “বীৰাংগনা সাধনী” ৰূপালী গল্পটোৰ মূল বিন্দু। চৰিত্ৰটো নিৰ্মাণ কৰিছে এগৰাকী “নতুন নায়িকা”ক লৈ। “নায়িকা” গৰাকীক এতিয়াও “প্ৰচাৰ”লৈ অনা নাই। চিত্ৰগ্ৰহণৰ সময়তো “নায়িকা” আঁৰতে থাকিল। থাকিল মানে, পৰিচালকেই ইচ্ছাকৃতভাবে আঁৰতে ৰাখিলে। আশা কৰা হৈছে এই চৰিত্ৰটো হ’ব ৰূপালী গল্পটোৰ বিশেষ সৌন্দৰ্য। আন অভিনয় সৌন্দৰ্য হ’ব– “নীতিপাল” লুকানন্দ, সুৰধ্বজ পাল” মৃদুল চুতীয়া, ‘কাঁচিতৰা” তপন দাস, “ৰজা ধীৰনাৰায়ণ” ভৱেশ বৰুৱা আদি। আন কেইটমান চৰিত্ৰ নিৰ্মাণ কৰিছে প্ৰাঞ্জল শইকীয়া, মলয়া গোস্বামী, লেম ছেঞ্চু, হিমাংশু প্ৰসাদ দাস, ৰাজীৱ ক্ৰ’, চন্দনা শৰ্মা, পলাশ মেচ, অৰুণ হাজৰিকা, ৰমেন তামুলীকে ধৰি প্ৰায় ৫০০ আভিনেতা-অভিনেত্ৰী লৈ।
–এক বিশাল ইউনিট লৈ কাম কৰিছে বিশ্বজিতে। অসমৰ, অসমৰ বাহিৰৰ। ডাইৰেক্টৰ অফ ফটোগ্ৰাফী এশৱাৰ ইয়েল্লুমাহান্থী। একচন ডাইৰেক্টৰ হিচাপে আছে দক্ষিণৰ এগৰাকী প্ৰখ্যাত একচন ডাইৰেক্টৰ এন জি বাবু। কলা নিৰ্দেশনা নুৰুদ্দিন আহমেদৰ। সংগীত অংগৰাগ পাপন মহন্তৰ। কষ্টিউম লুপামুদ্ৰা গগৈ বৰাৰ।প্ৰযোজনা নিয়ন্ত্ৰক অসীম শইকীয়া। চিত্ৰনাট্য বিশ্বজিত বৰা, লুপামুদ্ৰা গগৈ বৰা আৰু বিনীদ মেননৰ।