Kok Kok Kokok | লুকানিয়াত অসমৰ চিনেমাৰ বিজয়

অসমীয়া চিনেমাৰ সাম্প্ৰতিক আন্তঃৰাষ্ট্ৰীয় যাত্ৰাত ২০২৬ চনৰ আগষ্ট মাহে এটা গুৰুত্বপূৰ্ণ অধ্যায় সংযোজন কৰিলে। অসমৰ পৰিচালক মহৰ্ষি তুহিন কাশ্যপৰ ‘কক কক ককক’-এ ইটালীৰ পিষ্টিচ্চিত অনুষ্ঠিত ২৭সংখ্যক লুকানিয়া ফিল্ম ফেষ্টিভেলত লাভ কৰিলে ‘ছিক্ৰেট প্ৰগ্ৰাম ফেলিনি এৱাৰ্ড’। কিংবদন্তি ইটালীয় পৰিচালক ফেডেৰিকো ফেলিনিৰ নামেৰে নামকৰণ কৰা এই বিশেষ স্বীকৃতি ছবিখনে লাভ কৰিছে উৎসৱৰ ‘ছিক্ৰেট প্ৰগ্ৰাম’ৰ অন্তৰ্গত প্ৰদৰ্শনৰ পাছত। বঁটাটো প্ৰদান কৰে বিশ্বখ্যাত ইৰানী চলচ্চিত্ৰকাৰ মহছেন মাখমালবাফে।

|| লুকানিয়া ফিল্ম ফেষ্টিভেল : পটভূমি ||

বাছিলিকাটা অঞ্চলৰ পিষ্টিচ্চিত অনুষ্ঠিত লুকানিয়া ফিল্ম ফেষ্টিভেল ইটালীৰ এটা গুৰুত্বপূৰ্ণ স্বাধীন চলচ্চিত্ৰ উৎসৱ। ২০২৬ চনৰ ২৭সংখ্যক সংস্কৰণৰ মূল উৎসৱ ৫ৰ পৰা ৯ আগষ্টলৈ পিষ্টিচ্চিত অনুষ্ঠিত হয়; ২ৰ পৰা ৪ আগষ্টলৈ পিষ্টিচ্চি, মাতেৰা আৰু টলভেত আগতীয়া বিশেষ অনুষ্ঠান অনুষ্ঠিত হৈছিল। উৎসৱৰ সামগ্ৰিক কাৰ্যসূচীত ২ৰ পৰা ৯ আগষ্টলৈ সাত দিনীয়া চলচ্চিত্ৰ, আলোচনা, প্ৰদৰ্শন আৰু সাংস্কৃতিক কাৰ্যসূচী আছিল।

২০২৬ৰ উৎসৱৰ কেন্দ্ৰীয় বিষয় আছিল ‘অপৰাধবোধ’—এজন মানুহৰ অন্তৰ্জগত, সমাজ, স্মৃতি, বৰ্তমান, বিবেক আৰু পৰিৱৰ্তনৰ সৈতে জড়িত এক গভীৰ মানৱীয় অনুভূতি। বিভিন্ন দেশ আৰু ভাষাৰ ছবিৰ মাজেৰে এই বিষয়টোক ভিন্ন ভিন্ন দৃষ্টিকোণৰ পৰা অনুসন্ধান কৰা হৈছিল।

উৎসৱৰ প্ৰতিযোগিতামূলক আন্তঃৰাষ্ট্ৰীয় বিভাগত পূৰ্ণদৈৰ্ঘ্যৰ ছবি, স্বল্পদৈৰ্ঘ্যৰ কাহিনীধৰ্মী ছবি, তথ্যচিত্ৰ আৰু এনিমেচন আছিল। ইয়াৰ সমান্তৰালভাৱে আছিল ইটালীয় ছবিৰ বাবে ‘স্পাজিঅ’ ইটালিয়া’ বিভাগ।

মহৰ্ষি তুহিন কাশ্যপৰ ‘কক কক ক’কক’ অসমীয়া ভাষাৰ চিনেমা। সত্যজিৎ ৰায় ফিল্ম এণ্ড টেলিভিছন ইনষ্টিটিউটত অধ্যয়ন কৰি থকা সময়ত নিৰ্মাণ কৰা এই ছবিখন তেওঁৰ স্নাতকোত্তৰ পৰ্যায়ৰ ডিপ্ল’মা ছবি।

চিনেমা খনৰ কেন্দ্ৰীয় চৰিত্ৰ ছিকেন—এজন প্ৰব্ৰজিত কুকুৰা বিক্ৰেতা। তেওঁৰ জীৱনৰ সৈতে গভীৰভাৱে জড়িত এখন RX100 মটৰচাইকেল। মটৰচাইকেলখন তাৰ জীৱন-যাত্ৰাৰ এক অবিচ্ছেদ্য অংশ।

এটা ঘটনাৰ পাছত মটৰচাইকেলখন নোহোৱা হৈ যায়। তাৰ সৈতে জড়িত হৈ পৰে আৰক্ষীৰ গোচৰত ফচি যোৱাৰ ভয়। এই ভয়, উদ্বেগ আৰু মটৰচাইকেলখনৰ প্ৰতি তেওঁৰ অস্বাভাৱিক আসক্তি ক্ৰমাৎ এনে এক পৰিস্থিতিৰ সৃষ্টি কৰে, য’ত বাস্তৱ আৰু অবাস্তৱৰ সীমাৰেখা ভাঙিবলৈ আৰম্ভ কৰে। শেষত ছিকেন নিজেই যেন মটৰচাইকেলখনত ৰূপান্তৰিত হৈ পৰে।

এই ৰূপান্তৰেই চিনেমা খনক সাধাৰণ সামাজিক বাস্তৱবাদৰ সীমাৰ পৰা আঁতৰাই মায়া বাস্তৱতা, ব্যংগ আৰু অবাস্তৱতাৰ এক স্বতন্ত্ৰ চলচ্চিত্ৰ-ভাষালৈ লৈ যায়। চিনেমা খনে সমকালীন অসম আৰু ভাৰতৰ ৰাজনীতিৰ লগতে প্ৰব্ৰজিত মানুহৰ অনিশ্চয়তা আৰু ভংগুৰ অস্তিত্বকো অনুসন্ধান কৰে।

|| মানুহ আৰু যন্ত্ৰৰ মাজৰ সীমাৰেখা ||

‘কক কক ক’কক’ৰ অন্যতম আকৰ্ষণীয় দিশ হৈছে মানুহ আৰু বস্তুৰ সম্পৰ্ক। RX100খন চিনেমা খনত ছিকেনৰ জীৱন। মটৰ চাইকেলখন হেৰুৱাই ছিকেনে যেন নিজৰ অস্তিত্বৰেই এটা অংশ হেৰুৱায়।

সেয়ে শেষৰ ৰূপান্তৰক কেৱল কাহিনীৰ এক অদ্ভুত ঘটনা বুলি চালে চিনেমা খনৰ গভীৰতা ধৰা নপৰে। মানুহে নিজৰ জীৱন, পৰিচয়, সম্পত্তি আৰু অস্তিত্বৰ সৈতে কেনেদৰে এক জটিল সম্পৰ্ক গঢ়ি তোলে—ছবিখনে তাৰেই এক ব্যতিক্ৰমী ৰূপক সৃষ্টি কৰিছে।

প্ৰব্ৰজন, ভয় আৰু ‘অন্য’ হৈ থকাৰ অভিজ্ঞতা

ছিকেন এজন প্ৰব্ৰজিত মানুহ। সমাজৰ কেন্দ্ৰৰ পৰা অলপ আঁতৰত থকা এই মানুহজনৰ জীৱনত আইন, আৰক্ষী, সন্দেহ আৰু সামাজিক অনিশ্চয়তা একেলগে উপস্থিত।

লুকানিয়া ফিল্ম ফেষ্টিভেলৰ ২০২৬ৰ কেন্দ্ৰীয় বিষয় ‘অপৰাধবোধ’ৰ সৈতে চিনেমা খনৰ এই দিশটোৰ এক তাৎপৰ্যপূৰ্ণ সংযোগ আছে। ব্যক্তি আৰু সমাজৰ সম্পৰ্ক, ভয়, সন্দেহ, বিবেক আৰু ৰূপান্তৰ—এইবোৰ চিনেমা খনৰ ভিতৰতো বিভিন্ন স্তৰত উপস্থিত।

|| ‘কক কক কুকুক’ৰ আন্তঃৰাষ্ট্ৰীয় যাত্ৰা ||

লুকানিয়াই চিনেমা খনৰ আন্তঃৰাষ্ট্ৰীয় যাত্ৰাত নতুন অধ্যায় যোগ কৰিছে। চিনেমা খনৰ বিশ্ব প্ৰিমিয়াৰ হৈছিল Busan International Film Festivalত। তাৰ পাছত ই International Film Festival of Kerala আৰু Dhaka International Film Festivalতো প্ৰদৰ্শিত হয়। লুকানিয়াত চিনেমা খনৰ ইউৰোপীয় প্ৰিমিয়াৰ অনুষ্ঠিত হয়।

চিনেমা খনৰ কলাকুশলী:

প্ৰযোজক এছ. এম. নাজমুল হক। চিত্ৰগ্ৰহণ কৰিছে শিংখানু মাৰ্মা, সম্পাদনা সাদাং আৰাংহাম, আৰু শব্দ-নক্সাৰ দায়িত্বত অৰ্ণৱ বৰা। মুখ্য অভিনয়ত আছে ৰাজু ৰয় আৰু এষ্টাৰ জামা পলিনো কেনি।

মহৰ্ষি তুহিন কাশ্যপ : এটা ধাৰাবাহিক চলচ্চিত্ৰ-যাত্ৰা

‘কক কক ক’কক’ৰ সফলতা হঠাৎ অহা ঘটনা নহয়। মহৰ্ষি তুহিন কাশ্যপে ইয়াৰ আগতেই স্বল্পদৈৰ্ঘ্য আৰু তথ্যধৰ্মী চিনেমাৰ জৰিয়তে আন্তঃৰাষ্ট্ৰীয় পৰিসৰত নিজৰ উপস্থিতি প্ৰকাশ কৰিছে।

তেওঁৰ ‘দ্য হৰ্চ ফ্ৰম হেভেন’ ২০২৩ চনৰ অস্কাৰৰ বাবে ভাৰতৰ অফিচিয়েল এণ্ট্ৰি হিচাপে প্ৰেৰণ কৰা হৈছিল আৰু ছবিখনে VGIK International Student Festival, Golden Raven International Film Festival আৰু Bengaluru International Short Film Festival আদি উৎসৱত স্বীকৃতি লাভ কৰিছিল।

পৰিচালক গৰাকীৰ তথ্যধৰ্মী চিনেমা ‘ফ্লাৱাৰ্ছ ইন এ হেইলষ্টৰ্ম’ জাপানৰ Nara International Film Festivalত প্ৰদৰ্শিত হৈছিল। তেওঁ ‘বৰষুণ – চংছ ফৰ ৰেইনছ’, ‘বুলু ফিল্ম’ আৰু ‘গুডবাই গুৰ্জী’, ‘xyz’ আদি চিনেমাৰ চিত্ৰনাট্যৰ সৈতেও জড়িত।

তুহিনে ২০২৫ চনত SRFTIৰ পৰা স্নাতক হয়।

|| লুকানিয়া ২০২৬ : প্ৰতিযোগিতাৰ সম্পূৰ্ণ ফলাফল ||

আন্তঃৰাষ্ট্ৰীয় পূৰ্ণদৈৰ্ঘ্যৰ বিভাগত নিৰ্বাচিত চিনেমা সমূহৰ ভিতৰত আছিল ‘পেল উইণ্ড’, ‘স্পেচটাইম ক্ৰনিকলছ’, ‘ষ্টাৰ্ছ অৱ লিটল ইম্পৰ্টেন্স’, ‘লা কালে পুৰা’, ‘হোৱেৰ দ্য ছান শ্বাইনছ ব্ৰাইট’, ‘গ্ৰীন ডেজাৰ্ট’ আৰু ‘নিউ বিগিনিংছ’। এই ছবিসমূহৰ ভিতৰত ‘গ্ৰীন ডেজাৰ্ট’, ‘লা কালে পুৰা’, ‘নিউ বিগিনিংছ’ আৰু ‘পেল উইণ্ড’ তথ্যচিত্ৰধৰ্মী, আনহাতে ‘হোৱেৰ দ্য ছান শ্বাইনছ ব্ৰাইট’ কাহিনীধৰ্মী চিনেমন।

স্বল্পদৈৰ্ঘ্যৰ কাহিনীধৰ্মী বিভাগত আছিল ‘এষ্ট্ৰ’নাউটা’, ‘লাষ্ট শ্বট’, ‘টেলিছমেন’, ‘মাই ডাৰ্লিং’, ভাৰতৰ ‘লিপি: দ্য আনৰিটেন স্ক্ৰিপ্ট’, ‘উইণ্ড’, ‘লাষ্ট ট্ৰপিক্স’, ‘ইছহাক’, ‘কৰ্পি এষ্ট্ৰানেয়ি’, ‘শ্ব’টাইম’, ‘দাঁ লা গ্যুল দ্য ল’ৰ্ছ’, ‘ফিগ্লিঅ’ আৰু ‘নাৰমুক’।

স্বল্পদৈৰ্ঘ্যৰ তথ্যচিত্ৰ বিভাগত আছিল ‘ড’ভে ছামুৱেল?’, ‘এভৰিডে ইন গাজা’, ‘লা কণ্ডিজিঅ’নে দেল গ্ৰাম্বে’, ‘হিষ্ট্ৰী ডাজ়ণ্ট ন’ মাই নেম ইয়েট’, ‘ইল ছুৱোনো দেল লেনো’, ‘ছাফুৰা’, ‘লা কিলোনে’, ‘৩ ডেইজ, ৩ নাইটছ’ আৰু ‘গালিনা ভাছিলিয়েভনা ভি.এছ.’।

এনিমেচন বিভাগত আছিল ‘প্ৰফিটেবল প্লেচ’, ‘ফিন পিপল’, ‘বাৰ্ডছং’, ‘উন ফ্যুগ’, ‘একুৱেৰিয়াম’, ‘লাইক ফ্ৰেণ্ড, লাইক ডিয়াৰ’ আৰু ‘ৰুপেলি’।

ইটালীয় ছবিৰ ‘স্পাজিঅ’ ইটালিয়া’ বিভাগতো ‘লা ত্ৰুফা’, ‘জাকো’, ‘ফৰ্টুনা’, ‘দালা লানা আল্লা লুনা’, ‘ইল নেমিকো’, ‘পাৰ ল’আমোৰে’, ‘ই পিংগুইনি’, ‘কমাণ্ডো ইঅ’, ‘ইল ভেলো’ আৰু ‘হ’ল্ড অন’ আছিল।

ভাৰতীয় উপস্থিতি

এই বৃহৎ আন্তঃৰাষ্ট্ৰীয় প্ৰতিযোগিতাত ভাৰতৰ প্ৰতিনিধিত্ব কৰিছিল অনীশ এছ.-ৰ ‘লিপি: দ্য আনৰিটেন স্ক্ৰিপ্ট’-এ। ১৪ মিনিটৰ ছবিখন ৱায়ানাডৰ এখন দূৰৱৰ্তী জনজাতীয় বিদ্যালয়, পাণিয়া জনগোষ্ঠীৰ ভাষা-সংস্কৃতিৰ সংকট আৰু এগৰাকী শিক্ষকৰ বিদ্যালয় পুনৰ নিৰ্মাণৰ প্ৰচেষ্টাক কেন্দ্ৰ কৰি নিৰ্মিত।

এই ছবিখনৰ উপস্থিতি বিশেষভাৱে উল্লেখযোগ্য, কাৰণ ‘লিপি’ আৰু ‘কক কক ক’কক’—দুয়োখনেই ভাৰতৰ প্ৰান্তীয় জীৱন, পৰিচয় আৰু সামাজিক বাস্তৱক নিজৰ নিজস্ব ভাষাত বিশ্বৰ আগত উপস্থাপন কৰিছে।

|| ‘ছিক্ৰেট প্ৰগ্ৰাম’ আৰু ফেলিনি বঁটা ||

‘কক কক ক’কক’ৰ ক্ষেত্ৰত এটা কথা স্পষ্ট কৰা প্ৰয়োজন— লুকানিয়াৰ মূল আন্তঃৰাষ্ট্ৰীয় প্ৰতিযোগিতাৰ তালিকাত থকা চিনেমি নহয়। আছিল ‘ছিক্ৰেট প্ৰগ্ৰাম’ৰ অংশ।

উৎসৱৰ ৬ আগষ্টৰ কাৰ্যসূচীত মহছেন মাখমালবাফে প্ৰথমখন ‘secret film’ ইউৰোপীয় প্ৰিমিয়াৰত উপস্থাপন কৰাৰ কথা উল্লেখ আছিল; চিনেমা খনৰ নাম আৰু পৰিচালকৰ নাম প্ৰদৰ্শনৰ আগলৈকে গোপন ৰখা হৈছিল। ৭ আগষ্টতো দ্বিতীয়খন secret filmৰ বাবে একে পদ্ধতি অনুসৰণ কৰা হৈছিল।

এই বিশেষ কাৰ্যসূচীৰ পৰা ‘কক কক ক’কক’ লাভ কৰে ‘ছিক্ৰেট প্ৰগ্ৰাম ফেলিনি এৱাৰ্ড’। উৎসৱৰ এই স্বীকৃতিৰ কথা ১৬ আগষ্টত অসমৰ সংবাদমাধ্যমতো প্ৰকাশ পাইছে।

অৰ্থাৎ ‘ফেলিনি বঁটা’ক মূল প্ৰতিযোগিতাৰ ‘শ্ৰেষ্ঠ ছবি’ বঁটা বুলি কোৱা উচিত নহয়। ছিক্ৰেট প্ৰগ্ৰামৰ বিশেষ স্বীকৃতি। এই পাৰ্থক্যটো তথ্যগতভাৱে গুৰুত্বপূৰ্ণ।