বলীউডৰ কিং খানক পুনৰবাৰ দেখা যাব নেটফ্লিক্সত। অভিনেতা শ্বাহৰুখ খানে পূৰ্বতে তেওঁৰ দুখন ৱেব চিৰিজ “ক্লাছ অৱ ৮৩” ৰ লগতে “ৱাৰ্ড অৱ ব্লাড” ৰ বিষয়ে ঘোষণা কৰে। ইয়াৰ পিছতেই এখন হ’ৰৰ চিৰিজ “বেতাল” ৰ কথা পোহৰলৈ আহিছে। “বেতাল” ৰ কাহিনীৰ লগতে পৰিচালনা পেট্ৰিক গ্ৰাহামৰ। সহঃপ্ৰযোজনা নেটফ্লিক্স, ৰে’ড চিল্লি এণ্টাৰটেইনমেণ্ট আৰু গৌৰৱ বৰ্মাৰ। উক্ত চিৰিজ খনত অভিনয় কৰিছে বিনীত কুমাৰ সিং আৰু আহানা কুৰ্মাই।
ইয়াৰ উপৰিও, কিং শ্বাহৰুখ খানৰ সহঃপ্ৰযোজনাৰে নেটফ্লিক্স আহিবলগীয়া ৱেব চিৰিজ “ৱাৰ্ড অব ব্লাড” ৰ তাৰিখ নিৰ্ণয় কৰা হৈছে। চলিত বৰ্ষৰ চেপ্তেম্বৰ মাহৰ ২৭ তাৰিখে মুক্তি পাবলগীয়া এই চিৰিজখনত অভিনয় কৰিছে বলীউডৰ জনপ্ৰিয় অভিনেতা ইমৰান হাছমীয়ে। ৭ টা খণ্ড যুক্ত এই ৱেব চিৰিজখনৰ কাহিনীভাগ বিলাল চিড্ডিকীৰ একে নামৰ কিতাপৰ পৰা তুলি লোৱা হৈছে। “ৱাৰ্ড অৱ ব্লাড” ত ইমৰান হাছমীৰ লগতে অভিনয় কৰিছে বিনীত কুমাৰ সিং, সভিতা ধূলিপালা, কৃতি কুলহাৰী, গৌৰৱ বৰ্মা আৰু ৰঞ্জিত কাপুৰে।
Add comment