“জীৱনত এখনো চিনেমা নকৰা লোকে নতুন প্ৰজন্মক কি চিনেমা শিকাব সেয়া আলোচনাৰ বিষয়”- দেৱব্ৰত চলিহা

অসমত জন্মগ্ৰহণ কৰা বিভিন্ন যুৱক যুৱতী বৰ্তমান মায়ানগৰীৰ একোগৰাকী খ্যাতনামা শিল্পী। অসমীয়াৰ লগতে হিন্দী তথা আন আন ভাষাৰ ছবিসমূহতো কৰা এওঁলোকৰ কামবোৰে প্ৰায়ে জনসাধাৰণক গৌৰন্বিত কৰে। ইয়াৰে ভিতৰত এগৰাকী হৈছে শব্দযন্ত্ৰী দেৱব্ৰত চলিহা। লখিমপুৰৰ বিহপুৰীয়াত জন্মগ্ৰহণ কৰা দেৱব্ৰতে ২০০১ চনত Audiography and Sound Engineering ৰ তিনিবছৰীয়া ডিপ্লমা শিক্ষা গ্ৰহণ কৰি তেওঁ অসমৰ বিভিন্ন ধাৰাবাহিক ও ছবিৰ সৈতে জড়িত হৈ থাকে। ২০০৮ চনলৈ অসমতেই বিভিন্ন কাম কৰা পিছত তেওঁ ঢাপলি মেলে মুম্বাইলৈ। আইদেউ, বাঁকৰ পুতেক, বহ্নিমান আদি বিভিন্নখন ছবিত কাম কৰা দেৱব্ৰত চলিহা বৰ্তমান অসমকে ধৰি মায়ানগৰীৰ এক চিনাকী নাম। শেহতীয়াকৈ তেওঁৰ কৰ্ম দেখিবলৈ পোৱা গৈছিল বলীউড ছবি “পংগা” লগতে “লভ আজ কল” ছবি দুখনত।

আজিৰ ৰূপালীপৰ্দাৰ দেওঁবৰীয়া বিশেষত আমাৰ সৈতে আছে দেৱব্ৰত চলিহা; জানিম তেওঁৰ বিষয়ে কিছু কথা। চাওঁচোন আহকঃ

প্ৰশ্নঃ অসমৰ পৰা মুম্বাই; এই যাত্ৰাৰ আৰম্ভণি কেতিয়াৰ পৰা হৈছিল?

দেৱব্ৰত চলিহাঃ অসমৰ বিভিন্ন খন ছবিত কাম কৰাৰ পিছত মই মুম্বাইলৈ আহো ২০০৮ চনত। “Sikanar” নামে এখন হিন্দী ছবিৰ অফাৰ পাই মই অসমৰ পৰা ইয়ালৈ আহিছিলো। সেয়াই আছিল আৰম্ভণি…

প্ৰশ্নঃ ৰাষ্ট্ৰীয় ক্ষেত্ৰত কাম কৰি আৰু অসমীয়া ক্ষেত্ৰখনৰ সৈতে কিবা পাৰ্থক্য আপুনি অনুভৱ কৰেনে?

দেৱব্ৰত চলিহাঃ ৰাষ্ট্ৰীয় চলচিত্ৰ ক্ষেত্ৰ আৰু অসমীয়া চলচিত্ৰ ক্ষেত্ৰখনৰ মাজত মোৰ মতে আকাশ পাতাল প্ৰভেদ আছে। এখন ছবিত শব্দ সংযোজনৰ বাবে বেলেগকৈ কোনো বাজেট দিয়া নহয় লগতে অসমত উন্নত মানদণ্ডৰ ষ্টুডিঅ’ এটা নথকাৰ উপৰিও “5.1 studio” এটা ও বৰ্তমানলৈকে নিৰ্মাণ হোৱা নাই। উল্লেখ্য যে; ৰাষ্ট্ৰীয় ক্ষেত্ৰত ছবিগৃহ বা চাউণ্ড স্টুডিঅ’ সমুহত শেহতীয়াকৈ অহা প্ৰত্যেকটো টেকনল’জি সমৃদ্ধ বস্তু আছে কিন্তু অসমত ইয়াৰ অভাৱ পৰিলক্ষিত হয়। প্ৰায় অথবা বহুক্ষেত্ৰতেই “চাউণ্ড” বুলি যি আছে; তাক এলাগীয়ে কৰি ৰখা হৈছে অসমত।

আনহাতে, যিকোনো ঠাইত কাম কৰিবলৈ হ’লে কোনো এজন ব্যক্তি প্ৰফেচনেল অৰ্থাৎ পেশাদাৰী হ’ব লাগিব; কোনো কামৰ বাবদ এটা ধন লৈ কাম কৰাটোকে প্ৰফেচনেল হোৱাটো নুবুজায়। পেশাদাৰী হ’বলৈ হ’লে গ্ৰাহকে বিচৰা বিচৰা ধৰণে কাম দিব পাৰিব লাগিব আৰু লগতে সঠিক সময়ত ও দিব পাৰিব লাগিব।
বিশেষকৈ আমাৰ অৰ্থাৎ উত্তৰ-পূৰ্বাঞ্চলত চিনেমা শিক্ষাৰ বাবে এখন উপযুক্ত শিক্ষানুষ্ঠানৰ অভাৱ। শুনিবলৈ বেয়া যদিও, নিজে খোজ কাঢ়িব নাজানে কিন্তু আনক দৌৰিব শিকোৱা মানুহৰ দ্বাৰা পৰিচালিত হয় অসমৰ চিনেমা শিক্ষা।
জীৱনত এখনো চিনেমা নকৰা লোকে নতুন প্ৰজন্মক কি চিনেমা শিকাব সেয়া আলোচনাৰ বিষয়।

প্ৰশ্নঃ আগন্তুক প্ৰজেক্টৰ বিষয়ে জানিব বিচাৰিম।

দেৱব্ৰত চলিহাঃ আগন্তুক প্ৰজেক্ট হিচাপে মই বলীউডৰ জনপ্ৰিয় অভিনেতা ৰাজকুমাৰ ৰাওঁ অভিনীত এখন ছবিত বৰ্তমান ব্যস্ত হৈ আছো। লক-ডাউন খুলিলেই হয়টো পুনৰ বাৰ কামবোৰ আৰু পূৰ্ণগতিত চলিব।

প্ৰশ্নঃ ক’ৰ’ণা ভাইৰাছে ছবি ক্ষেত্ৰখনলৈ প্ৰত্যাহ্বান আনিবনে? আপুনি কি ভাবে?

দেৱব্ৰত চলিহাঃ “ক’ভিড ১৯” য়ে ইতিমধ্য চলচিত্ৰ জগতলৈ বহু খিনি প্ৰত্যাহ্বান আনিলে।প্ৰথম কথা ইয়াৰ ফলত সকলো দৃশ্যগ্ৰহণৰ কাম স্থগিত ৰখা হৈছে; যাৰ বাবে আমিও পোষ্ট প্ৰডাকচনৰ কাম বোৰ সম্পূৰ্ণ কৰিব পৰা নাই।
আনহাতে চিনেমা হৈছে এবিধ মনোৰঞ্জনৰ আহিলা আৰু মানুহে সমস্যাৰ পৰা মুক্তি পোৱাৰ পিছতহে হয়টো মনোৰঞ্জনৰ কথা ভাবিব; গতিকে বৰ্তমান পৰিপ্ৰেক্ষিতত, সকলোৰে লগতে চিনেমা জগতৰ এক ক’লা অধ্যায় চলি আছে।

প্ৰশ্নঃ আপোনাৰ ক্ষেত্ৰখনৰ সৈতে যদি কোনো নৱপ্ৰজন্মৰ যুৱক-যুৱতী জড়িত হোৱাৰ ইচ্ছা কৰে; তেনেহ’লে আপোনাৰ ফালৰ পৰা কি উপদেশ থাকিব?

দেৱব্ৰত চলিহাঃ যি সকল আহিব বিচাৰে তেওঁলোকক স্বাগতম জনাইছো; এইখন এখন বিশাল ক্ষেত্ৰ; ইয়াৰ দ্বাৰা ৰাষ্ট্ৰীয়-আন্তৰাষ্ট্ৰীয় পৰ্যায়ত যোৱাৰো বহু সুবিধা আছে। কিন্তু এইখিনিতে গুৰুত্বপূৰ্ণ যে, কোনো এটা বিষয়ত আগবাঢ়িবলৈ হ’লে; সেই বিষয়টোৰ ৮০ শতাংশ জ্ঞান থাকিব লাগিবই আৰু ইয়াৰ বাকী থকা ২০ শতাংশ অভিজ্ঞতাই শিকাব।
মুম্বাইত থাকিবলৈ হ’লে অভিজ্ঞ হৈয়ে আহিব লাগিব; নহ’লে ইয়াত কাম পোৱাটো খুবেই কঠিন। ইয়াত, কামত অভিজ্ঞতা থকাৰ লগতে জ্ঞান চাইহে কাম দিয়ে।

…… ধন্যবাদ দাদা। আপোনাৰ মতামতে নিশ্চয় সহায় কৰিব আহিবলগীয়া প্ৰজন্মক।

দেৱব্ৰত চলিহাঃ ধন্যবাদ।