নেপটিজিমৰ জ্বলন্ত উদাহৰণঃ হটষ্টাৰৰ কাৰ্যক্ৰমত আমন্ত্ৰণ কৰা নহ’ল বিদ্যুত জামাল ও কুণাল খেমুক-

“নেপোটিজিম” ক উদ্দেশ্যি এই সময়খিনিত বলীউডত বিভিন্ন কোঁচকাৱাজ চলা দেখিবলৈ পোৱা গৈছে। এনে সময়তে ডিজনী হটষ্টাৰে কৰিলে এক ডাঙৰ ঘোষণা; চলিত বৰ্ষৰ অক্টোবৰ মাহৰ ভিতৰত মুঠ ৭ খন চিনেমাক মুকলি কৰা হ’ব ডিজনী হটষ্টাৰত। এই ঘোষণাৰ পিছতেই উক্ত প্লেটফৰ্মটোৱে এক ভাৰ্চুৱেল কাৰ্যক্ৰমৰ আয়োজন কৰিছিল; য’ত উপস্থিত আছিল অক্ষম কুমাৰ, আলিয়া ভাট, অজয় দেৱগণ আৰু অভিষেক বচ্চন। কিন্তু এই কাৰ্যক্ৰমত উপস্থিত নাছিল বিদ্যুত জামাল অথবা কুণাল খেমু; ইয়াৰ পিছতেই ওলাই পৰিল এক ডাঙৰ সত্য। বিদ্যুত জামাল ও কুণালক কাৰ্যক্ৰমত আমন্ত্ৰণ কৰা হোৱা নাছিল যদিও হটষ্টাৰ অনুষ্ঠানটিত উপস্থিত আছিল বৰুণ ধাৱন। ইয়াকে উদ্দেশ্যি বিদ্যুতে এক পোষ্ট কৰি কয় যে,

“নিশ্চিতকৈ বহু ডাঙৰ ঘোষণা; ৭ খন ছবি মুকলিৰ বাবে সাজু হৈছে কিন্তু ইয়াৰ ভিতৰত কেৱলমাত্ৰ ৫ খনহে ছাগৈ প্ৰতিনিধিত্ব কৰাৰ যোগ্য আছিল কাৰণ বাকী দুখনক নিমন্ত্ৰণ কৰাও নহ’ল আৰু চিনাকীও দিয়া নহ’ল।” ইয়াৰ উপৰিও কুণাল খেমুয়ে কয় যে, “সন্মান আৰু প্ৰেম খুজি লোৱা বস্তু নহয়; কোনোৱে যদি দিবলৈ নোখোজে তেতিয়াহ’লে আমি তেওঁলোকতকৈও সৰু হৈ নপৰো। মাত্ৰ খেলাৰ বাবে এটা ঠাই সমানে দি দিয়ক; দীঘলীয়াকৈ খোজ আমিয়ে দিম।” নেপটিজিমক লৈ চলি থকা কিছু খবৰৰ মাজতেই হটষ্টাৰৰ এনে পদক্ষেপত ক্ষোভিত হৈছে জনসাধাৰণো। নেপটিজিমক ৰোধিবলৈ বৰ্তমান একাংশই বলীউডকেই বয়ক’ট কৰাৰ সিদ্ধান্ত গ্ৰহণ কৰি পেলাইছে।