অসমীয়া চলচ্চিত্ৰ ‘প্ৰস্তাৱনা – The Preamble’ৰ পোষ্টাৰ, ট্ৰেইলাৰ আৰু গীত মুকলি – প্ৰান্তিক ডেকা

দিলীপ বৰা আৰু মাণিক ৰায়ৰ যুটীয়া পৰিচালনাৰে নিৰ্মিত অসমীয়া ছবিখন বিগত বৰ্ষত ঘোষণা হোৱাৰ পিছত এতিয়া মুক্তিৰ বাবে সাজু হৈছে। অলপতে গুৱাহাটীৰ পাঞ্জাবাৰীত মুকলি কৰা হয় ‘প্ৰস্তাৱনা – The Preamble’ৰ তিনিখনকৈ পোষ্টাৰ। লগতে মুক্তি দিয়া হয় ছবিখনৰ টিজাৰ আৰু তিনিটা গীত। এক বাস্তৱধর্মী কাহিনীৰ আধাৰত নিৰ্মাণ কৰা এই ছবিখনৰ প্ৰযোজনা দিলীপ বৰা আৰু ড০ ৰবীন শইকীয়াৰ। প্ৰথিতযশা ঔপন্যাসিক, গল্পকাৰ, নিবন্ধকাৰ আৰু স্তম্ভলেখক দিলীপ বৰাৰ বহুপঠিত জনপ্ৰিয় উপন্যাস ‘যাত্ৰা’ৰ আধাৰত নিৰ্মাণ কৰা হৈছে এই নতুন অসমীয়া ছবি প্ৰস্তাৱনা – The Preamble’। দিলীপ বৰাৰ লগতে ছবিখনৰ পৰিচালনাৰ দায়িত্বত আছে অসমৰ নাট্য জগতৰ এটি চিৰ পৰিচিত নাম, সুদক্ষ পৰিচালক মানিক ৰয়।

ভাৰতৰ সাম্প্ৰতিক সামাজিক আৰু ৰাজনৈতিক পৰিস্থিতিয়ে দেশৰ ছাত্ৰ সমাজক কিদৰে ৰাজনীতিৰ চক্ৰবেহুত বন্দী কৰাৰ এক সম্ভাৱনা কঢ়িয়াই আনিছে, তাৰেই এক দৃশ্য প্ৰতিফলিত কৰা হৈছে প্ৰস্তাৱনা – The Preamble’ ছবিখনত। ৰাজনৈতিক হস্তক্ষেপে কেনেদৰে শিক্ষাৰ উদ্দেশ্যক বিকৃত কৰিব পাৰে, আৰু এনে হস্তক্ষেপৰ পৰা উদ্ভৱ হোৱা গভীৰ অন্যায় আৰু শোষণৰ এখন নিৰপেক্ষ ছবি আগবঢ়াইছে চলচ্চিত্ৰখনে।  ‘প্ৰস্তাৱনা – The Preamble’ত গণতান্ত্ৰিক মূল্যবোধৰ ৰক্ষাৰ ক্ষেত্ৰত সতৰ্কতাৰ প্ৰয়োজনীয়তাৰ ওপৰত বিশেষভাৱে গুৰুত্ব আৰোপ কৰা হৈছে আৰু জনসাধাৰণক ন্যায়, সমতা, স্বাধীনতা, আৰু ভ্ৰাতৃত্ববোধৰ আদৰ্শৰ বিষয়ে জ্ঞান দিবলৈ চেষ্টা কৰা হৈছে — ভাৰতীয় সংবিধানত সন্নিৱিষ্ট নীতিসমূহ যিয়ে বিশ্বৰ সৰ্ববৃহৎ গণতন্ত্ৰৰ মনোভাৱক ৰক্ষা কৰে।

ছবিখনৰ সন্দৰ্ভত দিলীপ বৰাই কয়, “ডেৰ-দুমাহৰ ভিতৰত ছবিখন মুক্তি দিয়াৰ পৰিকল্পনা কৰা হৈছে। ছবিখন নিৰ্মাণ কৰাৰ এটা অৰ্থ আছে। বৰ্তমান সমাজত যি পৰিস্থিতিৰ উদ্ভৱ হৈছে, বিশেষকৈ আস্থাহীনতা, সাম্প্ৰদায়িক অশান্তি, জাত-পাতৰ বিচাৰ, নতুন প্ৰজন্মক বিপথে পৰিচালিত কৰা যি প্ৰচেষ্টা এই সকলোবোৰ গোটাই মই চিনেমাৰ পৰ্দাত এটা ৰূপ দিব বিচাৰিছোঁ। প্ৰস্তাৱনা – The Preamble’ৰ মূল থীমটো হৈছে ন্যায়, সমতা, স্বাধীনতা আৰু ভাতৃত্ববোধৰ ওপৰত আধাৰিত৷ আশা কৰিছোঁ ৰাইজে ছবিখন ভাল পাব।”

অভিনেতা তপন দাসে ছবিখন সন্দৰ্ভত কয়, “মোৰ এইটো এটা নতুন অভিজ্ঞতা। দিলীপ বৰাৰ বহুপঠিত জনপ্ৰিয় উপন্যাস ‘যাত্ৰা’ পঢ়িছিলোঁ। তেতিয়াই বহুত আকৰ্ষিত হৈছিলোঁ উপন্যাসখন পঢ়ি। চৰিত্ৰটো যথেষ্ট প্ৰত্যাহ্বানমূলক। তেখেতৰ তত্ত্বাৱধানত যিখিনি কৰিব লাগে সেইখিনি কৰিবলৈ চেষ্টা কৰিছোঁ।”

‘প্ৰস্তাৱনা – The Preamble’ৰ কাহিনী আৰু চিত্ৰনাট্য দিলীপ বৰাই নিজেই ৰচনা কৰিছে। চিত্ৰগ্ৰহণ কৰিছে বিটুল দাসে, আৰু অনমোল ৰাজ শইকীয়াৰ লগতে ভাস্কৰ দত্তই সহকাৰী পৰিচালক হিচাপে কাম কৰিছে। ছবিখনৰ সম্পাদনা কৰিছে ৰাষ্ট্ৰীয় বঁটা বিজয়ী সম্পাদক এ. শ্ৰীকাৰ প্ৰসাদ আৰু প্ৰতিভাৱান ঝুলন কৃষ্ণ মহন্তাই।

ছবিখনৰ শব্দ ৰূপাঙ্কণ কৰিছে দেৱজিৎ গায়নে, লকেচন শব্দ মিক্সিং কৰিছে অৰ্ণব বৰাই, কলা নিৰ্দেশনা চম্ভালিছে গুলোক সাহাই, আৰু সুমন ফুকনে সাজ-পোছাকৰ তদাৰক কৰিছে। ছবিখনৰ কালাৰ গ্ৰেডিং’ৰ কাম কৰিছে ঘনশ্যাম কলিতাই, আৰু ভিএফএক্স আৰু চিজিআইৰ কাম কৰিছে মৃগাংক প্ৰতীক পৰাশৰে। উত্তম ডেকাই প্ৰডাকচন কণ্ট্ৰ’লাৰ হিচাপে কাম কৰাৰ বিপৰীতে ছবিখনৰ ষ্টিল ফটোগ্ৰাফী কৰিছে নীলাক্ষী নেওগে।

ছবিখনত সন্নিৱিষ্ট কৰা হৈছে তিনিটা গীত : সত্য ৰঞ্জন ভূঞাৰ ৰচনা, সুৰ আৰু পৰিবেশনাৰে “স্বহিদৰ কেছা ৰকটেৰে”, হিতেশ্বৰ ৰয়ৰ সংগীত, সুৰ, কণ্ঠৰে “অ মাজী ৰে” আৰু অমৰজ্যোতি কাকতি আৰু স্বপ্না জ্যোতি ঠেঙালৰ গীতৰ পৰা সুপৰিচিত শিল্পী মনজ্যোৎস্না মহন্তই পৰিবেশন কৰা এটি জেং বিহু গীত। ছবিখনৰ আৱহ সংগীত ৰচনা কৰিছে কোৱান বেই।

ছবিখনত অভিনয় কৰিছে তপন দাস, পাৰ্ভি বৰুৱা, হিল্লোল কুমাৰ পাঠক, দেৱজিত মজুমদাৰ, অশ্বিনী ভূঞা, অবতোষ ভূঞা, কৌশিক নাথ, আৰকে, সীমান্ত ৰাজ শৰ্মা কন্দলী, মাণিক ৰয়, অন্তৰা চৌধুৰী আদিকে ধৰি বহু ন-পুৰণি অভিনেতা-অভিনেত্ৰীয়ে।