বিতৰ্কিত “কা” ৰ পিছত আন এখন খচৰাঃ অভিনেতা মনোজ বৰকটকীৰ আপত্তি দাখিল-

বিৰ্তকিত “কা” ৰ পিছত এইবাৰ সৰ্বসাধাৰণ ৰাইজৰ মাজলৈ উলিয়াই অনা হৈছে EIA 2020 অৰ্থাৎ Enviromental Impact Assessment নামে এখন খচৰা। এই খচৰা খন যদিহে এখন আইনলৈ পৰিণত হয় তেনেহ’লে ই অসমবাসীৰ লগতে উত্তৰ-পূৰ্বাঞ্চলৰ জনসাধাৰণৰ পৰা কাঢ়ি নিব তেওঁলোকৰ প্ৰতিবাদ কৰাৰ অধিকাৰ। এই খচৰা খন আইনলৈ পৰিণত হোৱাৰ পিছতেই ভিন্ন মূল্যৱান সম্পদ তথা জৈৱ বৈচিত্ৰ্যৰে ভৰপূৰ প্ৰকৃতিৰ ওপৰত ধ্বংসলীলা চলাই সম্পদৰ অবাধ লুণ্ঠন হ’লেও ইয়াৰ বিৰোধিতা কৰাৰ ক্ষমতা হেৰুৱাব জনসাধাৰণে। এই আইনখনৰ বিৰোধিতাত নামিছে এতিয়া সৰ্বসাধাৰণ ৰাইজৰ লগতে অসমীয়া শিল্পী সকলো। “Say No To EIA” শীৰ্ষক এটি শ্লোগানেৰে চচিয়েল মিডিয়াত আৰম্ভ কৰা হৈছে এক প্ৰক্ৰিয়া। বৰ্তমান এই প্ৰক্ৰিয়াত ভাগ লৈছে অভিনেতা মনোজ বৰকটকীও; ইনষ্টাগ্ৰাম যোগে এটি ভিডিঅ’ আপলোড কৰি এই আটাইসমূহ কথা ব্যক্ত কৰে অভিনেতা গৰাকীয়ে।

মনোজ বৰকটকীয়ে ভিডিঅ’টোৰ জৰিয়তে প্ৰতিজন সচেতন নাগৰিক আৰু প্ৰকৃতিপ্ৰেমীক এই খচৰাখনৰ বিৰুদ্ধে অহা ১১ আগষ্টৰ ভিতৰত আপত্তি দাখিল কৰিবলৈ আহ্বান জনায়। চাওঁক এই ভিডিঅ’টোঃ

শিৱসাগৰত জন্মগ্ৰহণ কৰা মনোজ বৰকটকী বৰ্তমান মুম্বাইত প্ৰতিষ্ঠিত। অসমীয়া ছবিত কৰা অভিনয়ৰ লগতে অভিনেতা গৰাকীয়ে নিজেও পৰিচালনা কৰি উলিয়াইছে কেইবাখনো চুটি ছবি। ইতিমধ্যে তেওঁৰ পৰিচালনাৰে নিৰ্মিত চুটি ছবিয়ে লাভ কৰিছে ৰাষ্ট্ৰীয়-আন্তঃৰাষ্ট্ৰীয় প্ৰেক্ষাপটতো মনোনয়ন।